Karbohidratlarla çox məhdud və yağla zəngin olan ketogenik pəhriz, piylənmədən əziyyət çəkən insanlara Aralıq dənizi pəhrizi və az yağlı pəhrizdən daha çox metabolik fayda verə bilər.
Bu barədə “Cell Metabolism” jurnalında dərc olunan məqalədə bildirilir.
Məlumata görə, aparılan müvafiq tədqiqatda piylənmə, prediabet və yağlı qaraciyər xəstəliyi olan 42 nəfər iştirak edib. İştirakçılar təsadüfi olaraq üç qrupdan birinə təyin edilib: ketogenik pəhriz, Aralıq dənizi pəhrizi və az yağlı, əsasən bitki mənşəli pəhriz. Tədqiqatçılar onları lazım olan bütün qida maddələri ilə təmin edib və iştirakçılar hər həftə bir diyetoloqla görüşüblər.
Pəhriz, bütün könüllülərin ilkin bədən çəkilərinin təxminən 10%-ni itirməsini təmin etmək üçün hazırlanıb. Bu, orta hesabla dörd-beş ay çəkib.
Üç pəhrizin tərkibi əhəmiyyətli dərəcədə fərqlənib. Ketogenik pəhrizdə karbohidratlar kalorinin yalnız 4%-ni, yağlar isə 73%-ni təşkil edib. Aralıq dənizi pəhrizində bu rəqəmlər müvafiq olaraq 50% və 35%, az yağlı bitki mənşəli pəhrizdə isə 70% və 15% təşkil edib.
Hər üç qidalanma variantı yağ toxumasında əhəmiyyətli dərəcədə azalmaya səbəb olub və bədənin insulinə həssaslığını artırıb. Bununla belə, qaraciyər sağlamlığı və maddələr mübadiləsinin bir neçə göstəricisində ketogenik pəhriz ən təsirlisi olub.
Beləliklə, ketogen qrupun iştirakçılarında qaraciyər yağ tərkibi orta hesabla 67% azalıb, digər iki qrupda isə təxminən 45% azalıb.
Bundan əlavə, ketogenik pəhriz saxlayanlarda qaraciyərdə yağ ehtiyatlarının azaldılmasına kömək edən bir hormon olan qlükaqon səviyyəsi ən yüksək səviyyəyə çatıb. Eyni zamanda, onların qanında yüksək insulin səviyyəsi müşahidə olunub ki, bu da qaraciyər yağının azalması ilə əlaqələndirilir.
Tədqiqatçılar qeyd ediblər ki, ketogenik pəhriz, yüksək yağ tərkibinə baxmayaraq, qan yağının və ya xolesterol səviyyəsinin artmasına səbəb olmayıb. Tədqiqatın ilk müəllifi Maks Petersenin (Vaşinqton Universiteti Tibb Məktəbi) sözlərinə görə, bu, tədqiqatın ən gözlənilməz nəticələrindən biri olub.
Müəlliflər vurğulayırlar ki, çəki itirmə özü piylənmədən əziyyət çəkən insanlarda metabolik sağlamlığı yaxşılaşdırır. Lakin, tədqiqatın nəticələri göstərir ki, pəhriz tərkibi çəki itirməkdən asılı olmayaraq əlavə faydalar təmin edə bilər.
“Əgər bir insanın qaraciyəri çox yağlıdırsa və prediabet varsa, karbohidrat qəbulunun azaldılması çəki itkisinə əlavə olaraq maddələr mübadiləsinə əhəmiyyətli dərəcədə terapevtik təsir göstərə bilər”, - Tədqiqatın aparıcı müəllifi Samuel Klein bildirib.
