“Macarıstan Zelenskinin şantajına uymayacaq” − Orban

“Macarıstan Ukrayna müstəmləkəsi olmayacaq və Ukrayna Prezidenti Volodimir Zelenskinin təhdidlərinə və şantajlarına boyun əyməyəcək”.
Bunu ölkənin Baş naziri Viktor Orban xalqa müraciətində deyib.
O, bütün vətəndaşları 1848-ci il inqilabının milli bayramı olan 15 martda Budapeştdə keçiriləcək “Sülh Yürüşü”nə qoşulmağa çağırdı:
“Gəlin Ukrayna şantajına qarşı birlikdə dayanaq. Macarıstan Ukrayna müstəmləkəsi olmayacaq; Zelenski burda rəhbərlik etmir!”
Baş nazir Kiyevin Macarıstana siyasi təzyiq göstərmək və onu Ukraynanın Aİ-yə daxil olmasına razılıq verməyə məcbur etmək cəhdi ilə tətbiq etdiyi neft blokadasını xatırlatdı:
“Zelenski Macarıstan və Slovakiya üçün həyati əhəmiyyət kəsb etdiyini bilsə də, “Drujba” neft kəmərini bloklamağa davam edir”.
O bildirib ki, Ukrayna hakimiyyəti hələ də martın 11-i Kiyevə gedən bir qrup macar mütəxəssisinə Rusiya neftinin nəql ediləcəyi boru kəmərini yoxlamağa icazə vermir.