Putin xarici və beynəlxalq məhkəmə qərarlarının icrasını məhdudlaşdıran qanunu imzalayıb

Rusiya Prezidenti Vladimir Putin xarici və beynəlxalq məhkəmə qərarlarının icrasını məhdudlaşdıran qanun imzalayıb.

Sənədə görə, Rusiya həm Beynəlxalq Cinayət Məhkəməsinin (BCM), həm də gələcəkdə Ukrayna ilə bağlı yaradılması planlaşdırılan xüsusi tribunalın qərarlarını icra etməyəcək.

Qanunda göstərilir ki, Rusiya yalnız öz razılığı ilə qoşulduğu beynəlxalq müqavilələrə və ya BMT Təhlükəsizlik Şurası qətnamələrinə əsaslanan məhkəmə qərarlarını icra edəcək. Digər qərarlar ölkədə icra olunmayacaq.

Qanun layihəsi 2022‑ci ilin noyabrında Rusiya hökuməti tərəfindən Dövlət Dumasına təqdim edilib və dekabr ayında təsdiqlənib.

Bu dəyişiklik Beynəlxalq Cinayət Məhkəməsinin qərarlarına birbaşa təsir edir. 2023‑cü ildə Beynəlxalq Cinayət Məhkəməsi Vladimir Putin və Rusiya Prezidentinin uşaq hüquqları üzrə nümayəndəsi Mariya Lvova‑Belovaya qarşı həbs qərarı çıxarıb. Onlar Ukraynanın işğal edilmiş ərazilərindən uşaqların Rusiyaya qanunsuz köçürülməsində ittiham olunurlar. Rusiya əvvəlcə Beynəlxalq Cinayət Məhkəməsinə qoşulmaq istəyib, amma sonra qərarını dəyişib və bu öhdəliyi rəsmən ləğv edib.

Xüsusi tribunal Ukraynada hərbi təcavüzlə bağlı cinayətləri araşdırmaq üçün yaradılması planlaşdırılan tribunal olaraq müzakirə edilir. Bu ideya 2022‑ci ildə ortaya çıxıb, 2023‑cü ildə Avropa Parlamenti belə bir tribunalın yaradılması barədə qətnamə qəbul edib və 2025‑ci ilin iyununda Ukrayna Prezidenti Volodimir Zelenski ilə Avropa Şurasının baş katibi Alen Berse tribunalın yaradılması barədə saziş imzalayıblar.