"Oğlumun saxlanılmağı ilə bağlı yayılan xəbərlər yalandır". Bunu APA-ya xalq artisti İlhamə Quliyeva deyib. Onun sözlərinə görə, xəbər qərəzli olaraq yayılıb: "Bunu bizim ailəmizi istəməyən adamlar, qulluqçumun adamları yayıb. Oğlum evdə, ailəsinin başındadır. Özü oxuyub, mənə zəng edir, gülürdü". İ. Quliyeva oğlunun dostu Vüqar Bəşirovun da saxlanılmasını təkzib edib. Qeyd edək ki, "Yeni Müsavat" qəzeti İ. Quliyevanın oğlu Orxan Nadirov və onun tanışı Vüqar Bəşirovun Heydər Əliyev Beynəlxalq Hava Limanında saxlanılması haqqında xəbərlər yayıb.