Bu universitetə cəmi 68 tələbə qəbul oldu - 11 faiz

Xəbər verdiyimiz kimi, bu il ali təhsil müəssisələrinə qəbulun birinci mərhələsindən sonra 7 mindən çox boş yer qalıb. Bu rəqəm isə ötən illərə nisbətən bir qədər yüksəkdir. Belə ki, 2014-cü ildə boş qalan plan yerlərinin sayı 4050, 2015-ci ildə isə 6500 olub. Bu il isə birinci qəbulda bu rəqəm 7000-i keçib. Tələbə Qəbulu üzrə Dövlət Komissiyasının mətbuat xidmətinin rəhbəri Xanlar Xanlarzadə boş yerlərin taleyi ilə bağlı “Qafqazinfo”nun əməkdaşının sualını cavablandırarkən qurumun vəzifəsinin sadəcə qəbul prosesini həyata keçirmək və nəzarət olduğunu deyib: “Biz sadəcə tələbə qəbulunu həyata keçiririk. TQDK masabiqə elan edir və müəyyən yerlər dolur. Boş qalan yerlər üçün də sonradan qəbul keçirilir. Məsələn bu il avqustun 15-dən 19-a kimi növbəti qəbul aparılıb və 553 nəfər tələbə olmağa şans qazanıb. Hazırda bu ayın 31-ə kimi həmin abituriyentlərin qeydiyyatı aparılır. 6 mindən çox boş yer qalsa da, artıq biz öz vəzifəmizi tamamlayırıq və boş yerlər üçün növbəti qəbul olmayacaq”. Təhsil üzrə ekspert Kamran Əsədov da məsələni şərh edən zaman bu il ali məktəblərə qəbul olanların sayının son 8 ildə ən aşağı səviyyəyə endiyini deyib: “2003-2008-ci illərdə abituriyentlərin sayı 66%-ə kimi artıb. Ancaq təəssüflər olsun ki, 2008-ci ildən bu günə kimi isə bu rəqəm aşağı düşərək 20%-lik bir azalma müşahidə olunur. 2008-2009-cu tədris ilində ali məktəblərə 120 min abituriyent sənəd verirdisə, bu il bu rəqəm 85 minə qədər düşüb. Nəticə etibarilə bu il ali məktəblərə qəbul olanların sayı son 8 ildə ən aşağı səviyyəyə enib. Hazırda ölkəmizdə 43 təhsil mərkəzi var. Ən çox tələbə qəbul onunan universitet BDU-dur, 4798 plan yeri dolub. Özəl universitetlər arasında isə “Qafqaz” liderdir. Universitetə 733 abiturient daxil olub. Göründüyü kimi, arada çox böyük bir fərq var. Hətta özəl universitetlərdə boş qalan yerlərin sayı 50%-ə yaxındır. Odlar Yurdu, Avrasiya, Təfəkkür universitetlərində plan yerləri heç 50% də dola bilmədi. Hər il boş qalan yerlər artır. Buna baxmayaraq, qəbul komissiyası plan yerlərinin sayını hər ötən il bir az da artırır. Bu məsələyə ciddi nəzarət etmək lazımdır. Əmək bazarında ehtiyac olan ixtisaslara qəbul planını artırmaq məqsədə uyğundur nəinki, müəllim və s. Təhsil Naziriyinin bu il müəllimlər üçün keçirdiyi imtahanda 31 mindən çox işsiz müəllim iştirak edib. Halbuki plan yerinin sayı 3000 idi. Bu, o deməkdir ki, yaxın bir neçə il üçün müəllimlik tələbatını ödəyir". Bəs keçmiş MDB ölkələri ilə müqayisədə Azərbaycandakı vəziyyət qənaətbəxşdirmi? Ekspert bu suala cavab tapmaq üçün kiçik bir araşdırma edib və statistika hazırlayıb. “Belə ki, Ermənistanla müqayisədə abiturientlərimizin sayı dəfələrlə çoxdur. Bu il Ermənistanda ali məktəblərə 12 min abituriyent sənəd verib. Orada qəbul və buraxılış imtahanlarının birlikdə keçirildiyini nəzərə alsa, bu rəqəm ölkəmizdə 200 minə yaxındır. Qazaxıstanda əhalinin sayı 17 milyondur. Məzunlarının sayı isə 124 min təşkil edir. Qırğızıstanda 5 milyon əhali, 16 min məzun var. Bu rəqəm Belarusiya üçün 58 min, Bolqarıstan üçün isə 35 min olaraq dəyişir. Ancaq Azərbaycanda bu say olduqca yüksəkdir. Bu da onu göstərir ki, bizim elmi potensialımız, qəbul göstəricilərimiz daha yaxşıdır. Sadəcə olaraq, müvafiq qurumlar düzgün planlaşma apararaq bu potensialdan yaxşı istifadə etməyi bacarmalıdır”. Son olaraq qeyd edək ki, Ayrı-ayrı təhsil müəssisələrinə qəbul olan abituriyentlərin sayı haqqında statistik məlumata əsasən, bu il Azərbaycan Respublikası Prezidenti yanında Dövlət İdarəçilik Akademiyası, Azərbaycan Dövlət Bədən Tərbiyəsi və İdman Akademiyası, Bakı Ali Neft Məktəbi, Azərbaycan Respublikası Dövlət Gömrük Komitəsinin Akademiyası 100 faizlik qəbulolma göstəricisinə yiyələnib. Ən aşağı faiz isə “Odlar Yurdu” universitetindədir. 600 plan yerə 68 qeydiyyat aparılıb.

№	ALİ  TƏHSİL  MÜƏSSİSƏSİ	Plan	Qəbul olub (o cümlədən, dövlət sifarişi əsasında)			Qəbul-olma faizi
			Azərbaycan bölməsi	Rus bölməsi	Bölmələr üzrə cəmi
1	Bakı Dövlət Universiteti	5085	4154 (2213)	644 (136)	4798 (2349)	94.36
2	Azərbaycan Dövlət Neft və Sənaye Universiteti	2370	1869 (1263)	434 (212)	2303 (1475)	97.17
3	Azərbaycan Texniki Universiteti	2145	1728 (659)	119 (28)	1847 (687)	86.11
4	Azərbaycan Memarlıq və İnşaat Universiteti	1720	1324 (420)	145 (71)	1469 (491)	85.41
5	Azərbaycan Tibb Universiteti	995	922 (432)	49 (18)	971 (450)	97.59
6	Azərbaycan Dövlət Pedaqoji Universiteti	3055	2823 (1324)	146 (25)	2969 (1349)	97.18
7	Azərbaycan Dövlət İqtisad Universiteti	3565	2773 (987)	668 (108)	3441 (1095)	96.52
8	Azərbaycan Dillər Universiteti	1505	1266 (490)	192 (37)	1458 (527)	96.88
9	Bakı Slavyan Universiteti	986	699 (96)	169 (22)	868 (118)	88.03
10	Azərbaycan Respublikası Prezidenti yanında Dövlət İdarəçilik Akademiyası	360	220 (205)	140 (70)	360 (275)	100.00
11	"ADA" Universiteti	324	243 (0)	44 (0)	287 (0)	88.58
12	Bakı Musiqi Akademiyası	178	70 (38)	31 (26)	101 (64)	56.74
13	Azərbaycan Milli Konservatoriyası	155	122 (53)	7 (5)	129 (58)	83.23
14	Azərbaycan Dövlət Mədəniyyət və İncəsənət Universiteti	628	559 (113)	13 (0)	572 (113)	91.08
15	Azərbaycan Dövlət Rəssamlıq Akademiyası	455	329 (56)	86 (27)	415 (83)	91.21
16	Azərbaycan Turizm və Menecment Universiteti	470	426 (78)	41 (5)	467 (83)	99.36
17	Bakı Xoreoqrafiya Akademiyası	159	57 (9)	4 (0)	61 (9)	38.36
18	Azərbaycan Dövlət Bədən Tərbiyəsi və İdman Akademiyası	775	711 (174)	64 (20)	775 (194)	100.00
19	Milli Aviasiya Akademiyası	360	238 (173)	117 (65)	355 (238)	98.61
20	Azərbaycan Dövlət Dəniz Akademiyası	370	275 (115)	41 (4)	316 (119)	85.41
21	Bakı Ali Neft Məktəbi	135	122 (121)	14 (14)	136 (135)	100.00
22	Azərbaycan Respublikası Dövlət Gömrük Komitəsinin Akademiyası	44	44 (17)	0 (0)	44 (17)	100.00
23	Naxçıvan Dövlət Universiteti	1165	1085 (430)	0 (0)	1085 (430)	93.13
24	Naxçıvan Müəllimlər İnstitutu	305	290 (62)	0 (0)	290 (62)	95.08
25	Azərbaycan Dövlət Aqrar Universiteti (Gəncə ş.)	1445	1067 (638)	108 (51)	1175 (689)	81.31
26	Gəncə Dövlət Universiteti	1584	1330 (342)	30 (8)	1360 (350)	85.86
27	Azərbaycan Texnologiya Universiteti (Gəncə ş.)	975	414 (13)	33 (2)	447 (15)	45.85
28	Sumqayıt Dövlət Universiteti	1890	1464 (105)	26 (0)	1490 (105)	78.84
29	Mingəçevir Dövlət Universiteti	635	505 (45)	0 (0)	505 (45)	79.53
30	Lənkəran Dövlət Universiteti	860	774 (169)	0 (0)	774 (169)	90.00
31	Azərbaycan Kooperasiya Universiteti	1145	406 (0)	7 (0)	413 (0)	36.07
32	Bakı İslam Universiteti	125	89 (0)	8 (0)	97 (0)	77.60
33	"Azərbaycan" Universiteti	465	211 (0)	0 (0)	211 (0)	45.38
34	Qərb Universiteti	455	104 (0)	10 (0)	114 (0)	25.05
35	Xəzər Universiteti	785	368 (110)	21 (6)	389 (116)	49.55
36	"Qafqaz" Universiteti	1048	705 (390)	28 (15)	733 (405)	69.94
37	Elm və Təhsil Mərkəzi "Təfəkkür" Universiteti	380	166 (0)	2 (0)	168 (0)	44.21
38	Bakı Avrasiya Universiteti	510	248 (0)	3 (0)	251 (0)	49.22
39	Bakı Qızlar Universiteti	350	262 (0)	0 (0)	262 (0)	74.86
40	"Odlar Yurdu" Universiteti	600	66 (0)	2 (0)	68 (0)	11.33
41	Bakı Biznes Universiteti	600	356 (0)	1 (0)	357 (0)	59.50
42	"Naxçıvan" Universiteti (Naxçıvan şəhəri)	345	218 (0)	0 (0)	218 (0)	63.19
43	Azərbaycan Əmək və Sosial Münasibətlər Akademiyası	230	220 (0)	2 (0)	222 (0)	96.52
	CƏMİ	41736	31322 (11340)	3449 (975)	34771 (12315)	83.31