Avqustun 27-29-da Gürcüstanın Marneuli bələdiyyəsinin Serakvi kəndində One Caucasus beynəlxalq festivalı keçiriləcək. Festival çərçivəsində Azərbaycan, Gürcüstan və Ermənistan gənclərinin görüşü olacaq. "Turan"-ın məlumatına görə, "Gruzia online" bildirib ki, festivalda əsas məqsəd Qafqazda yaşayan gənclər üçün dinc, təhlükəsiz məkanın yaradılmasıdır. Üçgünlük festival çərçivəsində Gürcüstandakı Azərbaycan və erməni kəndlərinin uşaqları üçün mədəni-tədris tədbirlərinin keçirilməsi planlaşdırılır. Layihə Polşa Mədəniyyət və Milli İrs Nazirliyi və Marneuli İcra Hakimiyyətinin maliyyə dəstəyilə həyata keçirilir. Lakin məlumatda görüşün üç ölkənin nümayəndələri arasında, yoxsa Gürcüstan ərazisində yaşayan azərbaycanlı və erməni gənclər arasında olacağı aydın deyil.