“Neftin qiymətindəki enmə isə qorxulu siqnal deyil” - DEPUTAT

“ABŞ və İran arasında atəşkəs o deməkdir ki, regionda gərginlik azalır və vəziyyət daha sabit olur. Risklər azalanda təkcə siyasətdə yox, iqtisadiyyatda da vəziyyət yaxşılaşır. Çünki iqtisadiyyat ən çox sabitliyi sevir — harada risk azdırsa, orada inkişaf üçün şərait yaranır. Bəzilərinin narahat olduğu məsələ neftin qiymətinin enməsidir. Bu, əslində bazarın təbii reaksiyasıdır”.

Bu sözləri Pravda.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov deyib.

Deputat bildirib ki, müharibə riski artanda qiymətlər qalxır, risk azalanda isə qiymətlər geri enir: “Yəni bu enmə mənfi hadisə kimi yox, əksinə, vəziyyətin normallaşmasının əlaməti kimi qəbul olunmalıdır. Bazar sadə bir mesaj verir: qorxu azalır, sabitlik artır. Qısa müddətdə müəyyən gəlir azalması mümkündür, xüsusilə enerji ixrac edən ölkələr üçün. Amma uzunmüddətli baxanda əsas qazanc daha böyükdür. Çünki sabitlik olduqda ticarət genişlənir, investisiya artır, region daha cəlbedici olur. Bu isə daha dayanıqlı və davamlı iqtisadi inkişaf deməkdir. Nəticə etibarilə, atəşkəs region üçün yeni imkanlar pəncərəsi açır. Neftin qiymətindəki enmə isə qorxulu siqnal deyil, sabitliyə keçidin göstəricisidir. Ən vacib olan isə budur ki, sabitlik varsa, inkişaf da gec-tez özünü göstərəcək”.