Həmyerlisinin boynunu əlləri ilə sıxaraq sındıran şəxsə şərti cəza verildi

Gəncə Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Rasim Ocaqovun (soyadı şərtidir) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Dadaş İmanovun sədrliyi ilə keçirilən prosesdə hökm oxunub.

Məhkəmənin hökmü ona şərti cəza verilib.

İttihama əsasən, hadisə 03 iyul 2025-ci il tarixdə, saat 20 radələrində Bakı–Ələt–Qazax–Gürcüstan ilə dövlət sərhədi avtomobil yolunun 386-cı kilometrliyində, Şəmkir rayonu İpək yolu qəsəbəsi ərazisindən keçən hissədə yerləşən torpaq sahəsində qeydə alınıb.

Belə ki, həmin ərazi Şəmkir bələdiyyəsinin mülkiyyətində olan ehtiyat fondu torpaqları olub və Rasim Ocaqovun istifadəsində imiş.

Araşdırmalarla müəyyən edilib ki, zərərçəkmiş Eldar Nəbiyev (soyadı şərtidir) özünə məxsus xırdabuynuzlu heyvanları həmin ərazidə otararkən təqsirləndirilən şəxs buna etiraz edib və heyvanların oradan çıxarılmasını tələb edib. Bu zaman tərəflər arasında mübahisə yaranıb. Mübahisə zamanı Eldar Rasimə ağac parçası ilə baş nahiyəsindən xəsarət yetirib.

Bundan sonra yaranmış gərginlik fonunda təqsirləndirilən şəxs zərərçəkmişin boynunu əlləri ilə sıxaraq onu bir neçə dəqiqə hərəkətsiz vəziyyətdə saxlayıb. Nəticədə zərərçəkmiş şəxsə 6-cı boyun fəqərəsinin sınığı, oynaq səthinin yerdəyişmiş çıxığı və onurğa beyninin sıxılması ilə müşayiət olunan, tetraparezə səbəb olan ağır xəsarətlər yetirilib.

Məhkəmə iclasında Rasim Ocaqov ona elan olunmuş ittiham üzrə özünü təqsirli bilməyib. O, ifadəsində deyib ki, həmin ərazidə heyvanları üçün sıxılmış ot tayaları yerləşdirib və hadisə günü orada olan şəxslərə həmin yerdə ot yığdığını deyərək ərazini tərk edib. Onun sözlərinə görə, sonradan hadisə barədə məlumatı olmayıb və zərərçəkmiş şəxsə hər hansı xəsarət yetirməyib.

Təqsirləndirilən şəxs əlavə olaraq qeyd edib ki, hadisə zamanı başqa şəxslər də ərazidə olub və zərərçəkmiş şəxs həmin şəxslər tərəfindən oradan uzaqlaşdırılıb. O, baş verənlərlə bağlı üç dəfə “102” xidmətinə müraciət etdiyini də bildirib.