“Azərbaycanda səhiyyə ölüb, yerdən götürəni yoxdur. 3 saylı poliklinikada iki gündür ayağımı rentgen eləmirlər”.
Bunu tanınmış jurnalist Aytən Məmmədova sosial şəbəkə hesabında yazıb.
“Dünən saat 2-də getdim, dedilər ki, “rentgen saat 1-ə qədər işləyir, sabah gəl”.
Bu gün saat 11-də getdim, dedilər ki, “əvvəl cərrah Gülbəniz xanım baxıb rəy verməlidir. Onun da bu günlük xəstə limiti dolub, daha onun yanına xəstə yaza bilmərik. Çünki bir azdan çıxıb iclasa getməlidir. Cərrah baxmamış da rentgenə göndəriş verə bilmərik”.
Getdim Gülbənizin qapısına ki, bu nə deməkdir? Narazılıq, etirazdan sonra gəldi qəbula, dedi ki, “yazın mənə xəstə, amma iclas vaxtı çatanda çıxıb gedəcəm, baxmayacam”. Özünü də elə aparırdı, sanki tibb elmində yeniliklərə imza atıb, xəbərimiz yoxdur.
Gülbəniz kimisinin həkimliyi də özünə qalsın. Onsuz da mənə cərrah yox, rentgen lazım idi ki, ayağımın sınıb-sınmadığını bilim. Sadəcə, qəbulda dedilər ki, əvvəl cərrah baxmalıdır, sonra rentgenə getməlisən”, - jurnalist bildirib.
Aytən Məmmədova baş verənlərdən sonra rentgen üçün başqa xəstəxanaya getmək qərarına gəldiyini qeyd edib:
“İki gün ərzində boşuna əsəbiləşməkdən başqa bir şey qazanmadım o poliklinikadan.
Belə bir müəssisəyə büdcədən ayrılan vəsait də boş sərfiyyatdan başqa bir şey deyil”.
Jurnalistin iddiaları ilə bağlı TƏBİB-ə müvafiq sorğu ünvanlanıb.