ABŞ Prezidenti Donald Tramp rusiyalı həmkarı Vladimir Putinlə görüşün tarixini və yerini açıqlayıb.

Bu barədə Amerika lideri "Truth Social"da yazıb.

"Rusiya Prezidenti Vladimir Putinlə çoxdan gözlənilən görüşüm gələn cümə günü, avqustun 15-də, böyük Alyaska ştatında baş tutacaq. Təfərrüatlar bundan sonra olacaq. Məsələyə diqqətinizə görə təşəkkür edirik!", - Tramp qeyd edib.

Rusiya liderinin köməkçisi Yuri Uşakov məlumatı təsdiqləyib. Onun sözlərinə görə, yer seçimini iki ölkənin coğrafi yaxınlığı diktə edib.

Daha əvvəl “The New York Times” mənbələrə istinadən yazıb ki, Tramp Putinlə görüşməyi, az sonra isə Ukrayna Prezidenti Volodimir Zelenskinin iştirakı ilə üçtərəfli görüş keçirməyi nəzərdə tutur.

Qeyd edək ki, Prezident Vladimir Putin Alyaskaya səfər edən ilk Rusiya lideri olacaq. İndiyədək heç bir Rusiya prezidenti bu ştata səfər etməyib.

Statistik məlumatlara görə, orta amerikalı həyatı boyu 10,5 ştata səfər edir, lakin hər onuncu adam heç vaxt öz ştatından kənara səyahət etməyib və ABŞ sakinlərinin yalnız 12 %-i Alyaskaya səfər edib.

Rusiya prezidenti sonuncu dəfə 2015-ci ildə ABŞ-yə səfər edib.