Nazirlər Kabinetinin 38 yaşlı yeni Aparat rəhbəri kimdir?

Xəbər verdiyimiz kimi, bu gün Baş nazir Əli Əsədovun sərəncamı ilə Rüfət Tofiq oğlu Məmmədov Nazirlər Kabinetinin Aparat rəhbəri vəzifəsinə təyin olunub. Axar.az xəbər verir ki, R.Məmmədov 1981-ci ildə Bakı şəhərində anadan olub.

1998-2002-ci illərdə Bakı Dövlət Universitetində Beynəlxalq Hüquq ixtisası üzrə bakalavr təhsili, 2002-2003-ci illərdə Almaniyanın Drezden Texniki Universitetinin Avropa inteqrasiya hüququ üzrə magistr təhsili alıb. 

Əmək fəaliyyətinə 2002-ci ildə başlayıb, yerli və xarici şirkətlərdə hüquq sferasında çalışıb. R.Məmmədov 2010-2011-ci illərdə Azərbaycanda İxracın və İnvestisiyaların Təşviqi Fondunda (AZPROMO) vitse-prezident, 2011-2012-ci illərdə özəl sektorda konsultant olaraq çalışıb. 2012-ci ildən AZPROMO-nun prezidenti olub. Azərbaycan Respublikası Prezidentinin 2018-ci il 31 may tarixli Sərəncamı ilə iqtisadiyyat nazirinin müavini vəzifəsinə təyin olunub.