“Sədərək” firması valyuta tənzimi qaydalarını pozmaqda ittiham olunur.

İqtisadiyyat.az xəbər verir ki, şirkət barəsində Azərbaycan Mərkəzi Bankı (AMB) tərəfindən İnzibati Xətalar Məcəlləsinin 430.4-cü maddəsinə əsasən cərimə protokolu tərtib edilib.

Daha sonra protokol baxılması üçün Qaradağ Rayon Məhkəməsinə göndərilib və iş hakim Şəfa Dadaşovanın sədrliyi ilə araşdırılacaq.

Şirkətin barəsində protokol tərtib olunan maddədə deyilir ki, avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir.

Qeyd edək ki, 1995-ci ildə yaradılan “Sədərək” firması “Sədərək” Ticarət Mərkəzi ilə eyni şəxsə məxsusdur. “Sədərək” Firmasının təsisçisi “Sədərək” Ticarət Mərkəzinin sahibi Yusif Qədimbəylidir.