"Qarabağ" UEFA Avropa Liqasının Liqa mərhələsində ilk qələbəsini qazandı.

Musavat.com xəbər verir ki, Ağdam təmsilçisi IV turda Norveçin "Budyo Qlimt" komandasını 2:1 hesabı ilə məğlub edib.

Bude şəhərindəki "Aspmira" stadionunda keçirilən görüşdə hesabı "Qarabağ" açıb. 23-cü dəqiqədə Toral Bayramov gözəl zərbə ilə komandasını irəli çıxarıb. Ancaq meydan sahibləri fasiləyə qədər "status-kvo"nu bərpa ediblər və 41-ci dəqiqədə Patrik Berq bərabərlik qolunu vurub.

"Köhlən atlar"ın qalibiyyət qoluna isə Abdullah Zubir imza atıb. 59-cu dəqiqədə rəqibin qapısını silkələyən Zubir, "Qarabağ"a bu mövsüm Avropa Liqasında ilk qələbəsini qazandırıb.

Qeyd edək ki, "Qarabağ" növbəti Avropa Liqası oyununu noyabrın 28-də Fransa təmsilçisi "Lion" ilə keçirəcək.