2025-ci il yanvarın 1-dən “Qazprom” “Moldovaqaz”ın borclarına görə Moldova Respublikasına qaz nəqlini dayandıracaq. Bu barədə Rusiya konserninin bəyanatında deyilir.

“Qazprom” “Moldovaqaz”ı xəbərdar edib ki, borcun ödənilməməsi mövcud müqavilənin şərtlərinin əhəmiyyətli dərəcədə pozulmasıdır.

“Qazprom” və “Moldovaqaz” arasında müqavilə 2021-ci ildə beş il müddətinə bağlanıb. Müqavilənin əsas şərtlərindən biri də Kişinyov tərəfindən borcun ödənilməsi olub. Rusiyanın hesablamalarına görə, borc cərimələr daxil olmaqla 709 milyon dollar təşkil edir.Ötən ilin sentyabrında Moldovanın Baş naziri Dorin Recean demişdi ki, Kişinyov cəmi 8,6 milyon dollar borcu tanıyır və Rusiyaya 709 milyon dollar ödəmək niyyətində deyil.

Bu gün “Qazprom”un bəyanatını şərh edən Recean qeyd edib ki, Moldova tərəfi hələ də borcun mövcudluğunu inkar edir.

“Moldova Rusiyadan asılılığını azaltmaq üçün təbii qaz təchizatı mənbələrini şaxələndirib”, - Recean əlavə edib. O, təfərrüatları açıqlamayıb.

“AzPolitika.info”