Azərbaycanda tur şirkətləri ilə bağlı tez-tez problemlər yaşanır. Tur şirkətlərinin daha bir qurbanı Bakı şəhər sakini Qələndərova Təhminə “Qafqazinfo”ya “Yes” travel tur şirkəti ilə bağlı şikayət edib. O, şikayətində bildirir ki, “Yes” travel tur şirkəti onun tətil planlarını tamam alt-üst edib: “Baxmayaraq ki, 300-400 manat Azərbaycanda bir ailənin aylıq gəliridir, mən yenə də maddiyyatı bir kənara qoyub gördüyüm mənəvi zərərin haqqını tələb edirəm”. Tur şirkətinin qurbanı olan xanım qeyd edir ki, iyul ayının əvvəlində sosial şəbəkələrdə “Yes” travelin Avropa ölkələrinə (Livta, Latviya, Estoniya, Finlandiya) səyahət adlı reklamını görüb: "Getdim şirkətlə danışdım, ödənişlərlə tanış oldum və başladım sənədləri hazırlamağa. Yəqin ki, bu sənəd işlərinin necə uzun və yorucu bir proses olduğunu xaricə yolu düşən hər kəs yaxşı bilir. Sənədlərimi hazırladıqdan sonra agentliyə təqdim etdim. Agentlik də öz növbəsində aviabilet, oteldə qalmaq üçün yer sifariş etdikdən sonra konsulluqdan görüş aldıq, getdik səfirliyə. Tur şirkətinin nümayəndəsi mənə sənədləri gətirəndə gördüm ki, əslində uçacağımız  Kutaisi şəhərinin və qalacağımız otelin yerinə tam başqa adlar göstərilib. Səbəbini soruşanda dedi ki, olur belə şeylər. Əsas odur ki, sən viza alırsan, gedirsiniz. Bir də mənə tapşırdı ki, konsulluqda sadəcə Litvaya getdiyimizi deyim. Mən də fikirləşdim ki, yəqin, belə olmalıdır.

Konsul məndən təyyarənin, otelin tam ödənilmiş formada sənədlərini istədi. Növbəti gün sənədlərə baxanda uçuş arealımızın və otelin yerinin yenidən dəyişildiyini gördüm. Konsulluqda qızım, rəfiqəm və özüm üçün şengen vizası aldıq. Evə getmişik ki, tur şirkətindən bizə zəng gəldi və bildirildi ki, uçuş 26-dan 30-na dəyişdirilib. Baxmayaraq ki, məzuniyyətim bitirdi, razılaşdım. Hər birimiz üçün təxminən 650 manatlıq ödənişimizi də tam etdim. Səhəri gün zəng edib konsulluqdan bildirdilər ki, sizin şengen vizanız ləğv olunur. Səbəb kimi onu göstərdilər ki, bizim göstərilən ölkədə nə uçuşumuz, nə də qeyd edilən oteldə yer sifarişimiz var”.

“Yes” travel tur şirkətindən ödənişini geri alan Təhminə xanım deyir ki, sənəd işləri üçün ödədiyi maddi zərərin də təmin olunmasını istədiyi təqdirdə şirkət işçiləri onu günahkar çıxarıb: “Mənimlə yanaşı 5 nəfərin də belə uydurma sənədlərə görə səyahət planı yarımçıq qalıb və Bakının bu istisində bizim işimiz sənəd toplamaq olub. Mən məhkəməyə də müraciət edəcəm. Səhv mənim sənədimdə olsa, yenə yanmaram. Maddi zərər bir yana, mən və övladım necə mənəvi zərər gördük. Axı nəyə görə bizim məzuniyyətimiz heç olmalıdır, biz əlavə xərcə düşməliyik. Mən istəyirəm ki, bu vəziyyət işıqlandırılsın və vətəndaşlarımız bilsin ki, belə dələduz tur şirkətləri var”.

---