Azərbaycandan olan tələbə — Atabəy Rəcəbli ABŞ-da ICPC Regional Olimpiadasında birinci oldu (FOTO)
The University of Southern Mississippi universitetinin Kompüter Elmləri və Kompüter Mühəndisliyi fakültəsinin tələbələri Beynəlxalq Kollec Proqramlaşdırma Müsabiqəsinin (ICPC) Cənub-Şərqi ABŞ Regional mərhələsində birinci yerə layiq görülüblər.
Azinforum.az xəbər verir ki, Mayami şəhərində keçirilən müsabiqədə ABŞ-ın şərq və cənub bölgələrindən 16 ştatı təmsil edən 95 universitetin komandaları iştirak edib. Southern Miss komandası 13 tapşırıqdan 9-nu uğurla həll edərək ICPC Şimali Amerika Cənub Divizionu 2025 – Division 2 üzrə qalib olub və ölkənin aparıcı ali məktəblərinin komandalarını geridə qoyub.
ICPC beş saat davam edən proqramlaşdırma yarışıdır. Bu müsabiqədə üç nəfərə qədər tələbədən ibarət komandalar internetə çıxış olmadan, yalnız bir kompüter üzərində mürəkkəb alqoritmik və riyazi problemləri mümkün qədər tez və dəqiq şəkildə həll edirlər. Yarışda əsasən C++, Java və Python proqramlaşdırma dillərindən istifadə olunur. ICPC dünya üzrə keçirilən regional mərhələlərdən ibarətdir və qaliblər Dünya Finalına yüksəlmək imkanı əldə edirlər.
Southern Miss komandasının tərkibində birinci kurs tələbələri Atabay Rəcəbli və Abdelrahman Teima, eləcə də ikinci kurs tələbəsi Hosameldin Darwish yer alıb.
“Atabay Rəcəbli bildirib ki, ICPC tez-tez ‘Proqramlaşdırmanın Olimpiadası’ adlandırılır və yarış zamanı təzyiq çox yüksək olur. Biz aylarla hər gün saatlarla məşq etdik, bir-birimizin güclü və zəif tərəflərini öyrəndik. Məqsədimiz vaxt məhdudiyyəti və stres altında maksimum nəticə göstərmək idi. Bu uğurla sübut etdik ki, Southern Miss tələbələri ən yüksək səviyyədə rəqabət apara bilirlər.”
Komandanın məşqçisi, dosent doktor Ahmed Şerif yarışın tələbələr üçün yalnız texniki deyil, həm də peşəkar baxımdan böyük təcrübə olduğunu vurğulayıb.
“Bu nəticə tələbələrimizin Şimali Amerika Çempionatına və gələcəkdə ICPC Dünya Finalına yüksəlməsinə imkan yaradır. Onlarla fəxr edirəm,” – deyə o bildirib.
Dr. Şerif ICPC-ni dünyanın ən qədim və nüfuzlu proqramlaşdırma yarışlarından biri adlandıraraq, onun akademiya ilə sənaye arasında körpü yaratdığını və gələcək İT mütəxəssislərinin formalaşmasına töhfə verdiyini qeyd edib.
ICPC eyni zamanda böyük texnologiya şirkətləri, maliyyə qurumları və dövlət təşkilatları üçün mühüm kadr mənbəyi hesab olunur. Yarışdakı yüksək nəticələr tələbələrə təcrübə proqramları, iş imkanları və karyera inkişafı baxımından geniş perspektivlər açır.
Southern Miss-in Kompüter Elmləri və Kompüter Mühəndisliyi fakültəsində kompüter elmləri, kompüter mühəndisliyi, informasiya texnologiyaları və kibertəhlükəsizlik üzrə bakalavr proqramları, həmçinin magistr və doktorantura səviyyəsində təhsil imkanları mövcuddur.