Alen Simonyan: “Əliyev və Ərdoğanın Yerevandakı sammitdə iştirakını gözləyirik”

Ermənistan Milli Məclisinin spikeri Alen Simonyan 2026-cı ilin mayında Yerevanda keçiriləcək VIII Avropa Siyasi Cəmiyyəti (EPS) sammitində Azərbaycan və Türkiyə prezidentlərinin iştirak edəcəyini gözlədiyini bildirib.

Simonyan bunu jurnalistlərə açıqlamasında bəzi Azərbaycan KİV-lərinin Prezident İlham Əliyevin sammitdə iştirak etməyəcəyi barədə yayılan xəbərlərinə cavab olaraq deyib.

“Biz gözləyirik ki, həmişə iştirakçı olan bütün ölkələr bu mühüm tədbir çərçivəsində Ermənistana gələ biləcək. Burada başqa məntiq axtarmağa ehtiyac yoxdur, çünki açıqdır ki, belə halda Azərbaycan Prezidenti ya açıqlama verəcək, ya da rəsmi bir tədbir baş tutacaq”.

Milli Məclis sədri əlavə edib ki, son görüşündə azərbaycanlı həmkarı ilə Azərbaycan nümayəndə heyətinin EuroNest Parlament Assambleyasında iştirak etməməsi məsələsi də müzakirə olunub.

“Həmkarım mənə dedi ki, onların Ermənistan Respublikasına səfəri ilə bağlı heç bir problem yoxdur; EuroNestdə iştirak etməmələri yalnız həmin təşkilatla bağlıdır və əməkdaşlıq, qarşılıqlı səfərlərdə heç bir problem yoxdur”.

O, həmçinin qeyd edib ki, Azərbaycan nümayəndə heyətinin Yerevana, erməni delegasiyasının isə Bakıya səfərinə hər iki tərəf hazır olmalıdır.

“Əlbəttə, müzakirə olunmalı məsələlər var, xüsusilə əsirlərimiz və saxlanılan şəxslərlə bağlı. Lakin əlaqələr davam edəcək və daha da dərinləşəcək. Mənim təəssüratıma görə, Azərbaycan tərəfi də eyni mövqedədir”, – Simonyan əlavə edib.

VIII Avropa Siyasi Cəmiyyəti sammiti 2026-cı il mayın 4-də Yerevanda keçiriləcək. Xarici İşlər naziri Ararat Mirzoyan bildirib ki, sammitdə iştirak üçün həm Azərbaycan Prezidenti İlham Əliyevə, həm də Türkiyə Prezidenti Rəcəb Tayyib Ərdoğana şifahi dəvətlər çatdırılıb.

Ötən gün Azərbaycanın yerli mediasında İlham Əliyevin Yerevanda keçiriləcək Avropa Siyasi Cəmiyyəti sammitində iştirak dəvətini rədd etdiyi barədə xəbərlər yayılmışdı.