Həbsdə olan sabiq deputata daha bir cinayət işi açıldı

“Azərbaycan Beynəlxalq Bankı”nın vəzifəli şəxsləri ilə əlbir olaraq cinayət törətməkdə ittiham olunan Dünyamin Xəlilov və Azad Cavadovun barəsində cinayət işinin istintaqı yekunlaşıb.

Bu barədə iyunun 12-də Baş Prokurorluq məlumat yayıb.

Bildirilir ki, Dünyamin Xəlilov və Azad Cavadov 2001-2015-ci illər ərzində Beynəlxalq Bankın sabiq rəhbər vəzifəli şəxsləri ilə birgə cinayətkar qrup yaradaraq “General Construction” və “Bakı Fındıq Emalı Müəssisəsi”nə rəhbərlik ediblər. Onların bu müddət ərzində ümumilikdə 6 milyon 642 min manatdan artıq məbləğdə pul vəsaitini mənimsədikləri bildirilir. 

Dünyamin Xəlilov və Azad Cavadova Cinayət Məcəlləsinin 179.3.1 və 179.3.2-ci (mütəşəkkil dəstə tərəfindən və külli miqdarda mənimsəmə) maddələri ilə ittiham elan edilib.

Cinayət işi baxılması üçün Bakı Ağır Cinayətlər Məhkəməsinə göndərilib.

Xatırladaq ki, Dünyamin Xəlilov 2005 – 2010-cu illərdə Milli Məclisin deputatı olub.