Azərbaycan son illər xarici turistləri ən çox cəlb edən ölkələr sırasındadır. Bunu Dövlət Statistika Komitəsinin (DSK) 2024-cü ilin ilin ilk yarısı üçün açıqladığı rəqəmlərdən də görmək mümkündür. Belə ki, cari ilin ilk yarısında ölkəmizə 179 ölkədən 1 milyon 231 min nəfərdən çox turist gəlib. Bu isə əvvəlki ilin eyni dövrü ilə müqayisədə 34 % artım deməkdir. Azərbaycana gələn turistlərin 29,2%-i Rusiyadan, 17,3%-i Türkiyədən, 9,7%-i  Hindistandandır. Turistlərin 8,7%-i İran, 4,1%-i Gürcüstan, 3,2%-i Səudiyyə Ərəbistanı, 3,1%-i Qazaxıstan, 2,5%-i isə Pakistanın payına düşür. Ekspertlər hesab edirlər ki, ilin ikinci yarısında rəqəmlərin sayının daha da artması mümkündür. Lakin bu məsələdə əsas öhdəlik xüsusən regionlarda fəaliyyət göstərən sahibkarların payına düşür. 

Mövzu ilə bağlı Pravda.az-a fikirlərini bölüşən iqtisadçı-ekspert Eyyub Kərimli deyib ki, bu il Azərbaycana Rusiyadan gələn turistlərin sayının çoxluğu təkcə Rusiya-Ukrayna müharibəsi ilə əlaqəli deyil: 

“Rusiya vətəndaşı olub, əslən azərbaycanlı olan insanlar da turist kimi nəzərə alınır. Onlar daha çox ailələrini ziyarət etməyə və ya istirahət üçün Azərbaycana gəlirlər. Əlbəttə, turist axınında müharibənin də rolu var. Ölkəmizə daha çox turist cəlbi üçün  infrastruktur və turizm sənayesi inkişaf etməlidir. Əsasən regionlarımızda xidmət səviyyəsinin artırılmasına, daha yaxşı xidmət verən otellərin, ictimai iaşə sektorunun inkişafına böyük ehtiyac var. Bu gün regionlarda qiymətlərin xidmətlə uyğun olmamasını, orta səviyyəli istirahət mərkəzlərinin az olmasını müşahidə edirik. Düşünürəm, ölkəmizdə kənd, ailə turizmi də az inkişaf edib. Məsələn, balıqçılıq turizmi yaradıb, müəyyən şəraitdə ov turizmini gücləndirmək olar. Bölgələrin spesifik mətbəxini, istehsal etdikləri məhsulu turistlərə təqdim etmək də mümkündür. Bu nöqteyi-nəzərdən Gürcüstanın təcrübəsini nümunə göstərə bilərik. Bütün bunlar regiona turist cəlbini artıracaq. Turizmin inkişafı üçün infrastruktur layihələri genişləndirilməlidir. Qiymətlərin bahalığı regionlarda da müşahidə edilir. Bu da turizmin cəlbinə mənfi təsir göstərir”.  

İqtisadçı-ekpsert Eldəniz Əmirov isə bildirib ki, turizmin inkişaf etdirilməsi üçün mütləq şəkildə regionların inkişaf etidirilməsinə ehtiyac var:

“Regionların inkişafı və regional turizmin inkişafı bir-biri ilə sinxron şəkildə bağlıdır. Regionlarda turizm infrastrukturunun inkişaf etidirilməsi, aşağı ulduzlu otellərin fəaliyyətə başlaması, eyni zamanda torpaqların təyinatı ilə bağlı məsələyə yenidən baxılmasına ehtiyac var. Çünki adi otellərin tikilməsi üçün məhz torpaq təyinatı məsələlərində problemlər yaşanır. Paralel olaraq ev təsərrüfatlarının inkişaf etdirilməsi də turizmə öz müsbət töhfəsini verə bilər”. 

Yazı Azərbaycan Respublikasının Medianın İnkişafı Agentliyinin maliyyə yardımı ilə “Regionların sosial-iqtisadi inkişafının təşviq edilməsi” mövzusu üzrə dərc olunub.