Ağcabədidə tanışını bıçaqlamaqda təqsirləndirilən Nahid Həsənovun cinayət işi üzrə məhkəmə yekunlaşıb.

Pravda.az-ın əldə etdiyi məlumata görə, Lənkəran Ağır Cinayətlərt Məhkəməsinin hakimi Oruc Cəlilovun sədrliyi ilə keçirilən iclasda hökm elan olunub.

Hökmə əsasən, ona şərti cəza verilib.

İttihama görə, hadisə 18 sentyabr 2024-cü il tarixdə, saat 02:30 radələrində Ağcabədi rayonun Aşağı Qiyamadınlı kəndinin ərazisində qeydə alınıb.

Belə ki, Nahid Həsənov sözügedən kənd ərazisində yerləşən çayxananın yaxınlığında zərərçəkmiş Ricay Həsənovla mübahisə edib. Bu zaman zərərçəkmiş əlində olan ağacla onun bədənin müxtəlif nahiyələrinə vurub. Sonra Nahid zərərçəkmiş şəxsdən qisas almaq məqsədilə üzərində saxladığı mətbəx bıçağı ilə Ricayın qarın nahiyəsinə iki dəfə zərbə vuraraq, ona xəsarət yetirib.

Nahid Həsənov məhkəmə ifadəsində bildirib ki, zərərçəkmiş Ricayı bərbər kimi tanıyır, saçını ona qırxdırır. Hadisədən əvvəl Ricayın dayısı oğlunun toy mərasiminin keçirilməsi ilə bağlı hazırlıq işləri görülmüş və bir gün əvvəl, yəni 17 sentyabr 2024-cü il tarixdə həmin şəxsin “ciyər axşamı” məclisində iştirak edib. Məclisdə Nihadın qardaşı Tohit də iştirak edib. Yeyib-içdikdən sonra Ricay onun qardaşı Tohitin ünvanına nalayiq söyüşlər söyüb. Təqsirləndirilən şəxsin dediyinə görə, hadisə də elə bunun üstündə baş verib. O, çıxıb evə gedəndən sonra qardaşının döyüldüyünü eşidib, geri qayıdanda Ricayla yenidən mübahisə edib. Zərərçəkmiş əvvəlcə ağacla vurub. Daha sonra Nihad bıçaqla bərbəri bıçaqlayıb.